Laskorainen hainbat urte daramagu ebaluazioari buruz hausnartzen eta, azken urteotan, ebaluazio hezigarriari buruz ikasten eta gelara eramaten, 7KP sareko beste 6 ikastolarekin batera.

Pasa den astean, "Avaluar per Aprendre" taldearekin egun osoz sakon hausnartu genuen, Arizmendi Ikastolan. Talde horretako kide dira, besteak beste, Ebaluazio Hezigarriaren inguruan urte asko lanean diharduen Neus Sanmartí eta beste hainbat irakasle. Horretaz gain, Ikastolen Elkarteko eta Berritzeguneko hainbat kide ere bertaratu ziren.

Saio horren helburu nagusia gure ebaluazio-markoan aurrera egitearekin batera, curriculum-dekretu eta ebaluazio-agindu berriei erantzutea eta gure eraldaketaren bidean sortutako hainbat kezkari aurre egiteko bideak aztertzea izan da. Gure ikastolako LHko eta BHko arduradun pedagogikoek, 7KP ebaluazio lan-taldeko kide gisa, Neus Sanmartí eta gainontzeko kideekin lan egiteko aukera izan dute.